Este volume, publicado para conmemorar o primeiro cabodano da morte de Carlos Casares, concibiuse como unha homenaxe que se lle adica desde o Consello da Cultura Galega a quen foi o seu presidente entre 1996 e 2002. Foron convidadas a participar neste recoñecemento persoas de todos os ámbitos culturais que mantiveron estreitas relacións el, e o resultado destas colaboracións son este libro e o CD que o acompaña.
O libro contén escritos de creación literaria (poesía e narrativa), crítica e ensaios, así como a transcrición da intervención de Carlos Casares no Encontro de escritores galegos e portugueses, que se celebrou en Santiago de Compostela en 1991.
